Xidmət
Konsultasiya, əməliyyata hazırlıq və sonrakı nəzarət
Kimlər ürək cərrahına müraciət etməlidir, qəbula hansı nəticələrlə gəlmək lazımdır, əməliyyata hazırlıq və əməliyyatdan sonrakı nəzarət necə aparılır.
Kimlər ürək-damar cərrahına müraciət etməlidir?
Adətən xəstəni ürək-damar cərrahına kardioloq yönləndirir. Müraciət üçün tipik səbəblər:
- koronar angioqrafiyada ciddi və ya çoxsaylı darlıq aşkarlanıb, bypass tövsiyə olunub;
- stent və bypass arasında seçim barədə cərrahın rəyi lazımdır;
- exokardioqrafiyada ağır qapaq darlığı və ya çatışmazlığı aşkarlanıb;
- USM və ya KT-də aortanın genişlənməsi tapılıb;
- yetkin yaşda anadangəlmə ürək qüsuru, məsələn ASD aşkar olunub;
- infarktdan sonra sol mədəcikdə anevrizma və ya laxta müəyyən edilib;
- əvvəllər ürək əməliyyatı keçirmisiniz və kontrol müayinəsi lazımdır.
Qəbula nə gətirməli
- EKQ və exokardioqrafiyanın rəyi
- koronar angioqrafiyanın diski və rəyi (varsa)
- KT, MRT və digər görüntüləmə müayinələrinin disk və rəyləri
- son qan analizləri (xüsusən böyrək funksiyası və qan şəkəri)
- qəbul etdiyiniz bütün dərmanların siyahısı və dozaları
- əvvəlki xəstəxana çıxarışları, əməliyyat protokolları
Əməliyyata hazırlıq
Əməliyyatdan əvvəl ümumi vəziyyət, böyrək və ağciyər funksiyası, infeksiya ocaqları, lazım olduqda beyni qidalandıran damarlar yoxlanılır. Qanı durulaşdıran və digər dərmanların dayandırılması və ya dəyişdirilməsi yalnız həkimin göstərişi ilə edilir — dərmanı öz-özünə kəsməyin. Siqaret çəkirsinizsə, əməliyyatdan əvvəl imtina etmək ağciyər ağırlaşmalarının riskini azaldır.
Əməliyyatdan sonrakı nəzarət
Evə yazıldıqdan sonra kontrol müayinələrində yaranın vəziyyəti, ürəyin ritmi və funksiyası, dərman müalicəsi qiymətləndirilir. Dr. Beyrək Abbaszadənin paylaşdığı hallarda kontrol müayinələri əməliyyatdan bir həftə, iki həftə, bir ay, bir neçə ay və iki il sonra aparılıb. Növbəti kontrolların vaxtı hər xəstə üçün ayrıca təyin edilir.